પશુપાલકો માટે ખુશ ખબર, રાજકોટ જીલ્લા દૂધ ઉત્પાદન સંઘે પ્રતિકીલો ફેટએ રૂપિયા 20નો વધારો કર્યો

કોરોના મહામારીને કારણે આજે શહેર અને ગ્રામ્ય વિસ્તારના લોકો આર્થિક ખેંચ અનુભવી રહ્યાં છે તેમજ ચોમાસાની સીઝનમાં ખેતીમાં પૈસાની જરૂરીયાતને ધ્યાનમાં લઈને દૂધ ઉત્પાદકોને આર્થિક મદદ થવાના પ્રયાસ રૂપે દૂધ સંઘના નિયમક મંડળે 10 દિવસના ટૂંકા ગાળામાં બીજી વખત દૂધના પ્રતિકિલો ફેટના ખરીદ ભાવમાં રૂા. 20નો વધારો કરી દૂધ ઉત્પાદકોને તા.21/7/2020 થી દૂધના પ્રતિકિલો ફેટના ખરીદભાવ રૂા.680 આપવાનું નક્કી કર્યું છે.

SOURCE : INTERNET

રાજકોટ જીલ્લા સહકારી દૂધ ઉત્પાદક સંઘ દ્વારા દૂધ ઉત્પાદકોને ઓછા ભાવ અપાતા હોવાની ફેલાવાઈ રહેલી વાતો અંગે દૂધ સંઘના અધ્યક્ષ ગોવિંદભાઈ રાણપરીયાએ જણાવ્યુ હતું કે, રાજકોટ જીલ્લા દૂધ ઉત્પાદક સંઘે ગત વર્ષના અનિયમીત વરસાદથી માંડી ચાલુ વર્ષે કોરોનાની મહામારી વચ્ચે પણ સંપૂર્ણ સહકારની ભાવનાથી દૂધ ઉત્પાદકો અને દૂધ ખાનાર એમ બન્ને વર્ગનું ધ્યાન રાખી અનેક ઐતિહાસીક નિર્ણયો કર્યા છે. તેમજ સહકારીતાની ભાવના સાથે નફાની નહિં પરંતુ દુધ ઉત્પાદકોનું વધુને વધુ વળતર મળે તેવી ભાવના સાથે સમગ્ર નિયામક મંડળ (બોર્ડ) કામ કરી રહ્યું છે.

રાજકોટ જીલ્લા સહકારી દૂધ ઉત્પાદક સંઘ લીમીટેડના અધ્યક્ષ ગોવિંદભાઈ રાણપરીયાએ જણાવ્યું હતું કેે રાજકોટ જિલ્લા સહકારી દૂધ ઉત્પાદક સંઘ જીલ્લાના 75000થી વધુ દૂધ ઉત્પાદકોની સહિયારી માલીકીની આ સંસ્થા છે. તેમના પ્રતિનિધિ તરીકે અમે જવાબદારી સ્વીકારી તમામ વહીવટ અને વિકાસમાં વધુમાં વધુ દૂધ ઉત્પાદકોને આર્થિક ફાયદો મળે અને દૂધ વાપરનાર ગ્રાહકોને વ્યાજબી ભાવથી ઉચ્ચ ગુણવત્તાવાળું દુધ સરળતાથી ઉપલબ્ધ થાય તેવા અભિગમથી અમે અને અમારૂ નિયામક મંડળ કામગીરી કરી રહ્યું છે.

જીલ્લાના દૂધ ઉત્પાદકોને દૂધના મહત્ત્મ ભાવ મળે તે સંઘની પ્રથમ નિતિ છે. છેલ્લા 5 વર્ષનો સરેરાશ પ્રતિકિલો ફેટના ભાવમાં સતત વધારો ચુકવેલ છે. વર્ષ 2016-17 માં રૂા.608/-, 2017-18માં રૂા.625/-, 2018-19 માં રૂા.635/-, 2019-20માં રૂા.656/- ફાઈનલ ભાવ તરીકે ચુકવેલ છે.

સંઘે 2018-19ની સરખામણીએ 2019-20માં પ્રતિકિલો ફેટ દૂધનો ખરીદભાવ રૂા.21 વધારે ચુકવેલ છે. જેની ગણતરી કરતા રૂા.21 કરોડ જેટલી રકમ વધુ ચુકવેલ છે. જેનો સીધો ફાયદો દૂધ ઉત્પાદકોને થયેલ છે. વર્ષ 2019-20 દૂધ ઉત્પાદકો માટે કુદરતી રીતે તથા પશુ આહારના વધેલા ભાવથી કસોટી ભર્યું હતું. જુન-જૂલાઈમાં સમયસર વરસાદ ન આવતા ઘાસચારાની અછત ઉભી થઈ અને ઓગષ્ટ-સપ્ટેમ્બરમાં અતિભારે વરસાદ થવાથી ઘાસચારો ખૂબ બગડી જવાથી અને પશુઓને રોગચાળો લાગવાથી દૂધ ઉત્પાદનમાં ભયંકર ઘટાડો થયો હતો. જ્યારે કપાસીયાના ખોળનો ભાવ પ્રતિ બેગના રૂા.1800થી 2200 થયા હતા જ્યારે દાણનો ભાવ રૂા.1200 આસપાસ થવાથી કોઈપણ કાળે પશુપાલકોને પશુ નિભાવવા શકય ન હતા.

આવી પરિસ્થિતીમાં સંઘની વાર્ષિક સાધારણ સભામાં તારીખ 21/6/19થી પ્રતિકિલો ફેટે રૂા.680 ચુકવવાની જાહેરાત કરેલ હતી. ત્યાર પછી વધુ વિકટ પરિસ્થિતીનું નિર્માણ થતાં સંઘના નિયામક મંડળની બેઠકમાં વિસ્તૃત ચર્ચા કરીને તારીખ1/7/19 થી તારીખ 31/8/19 ના 2 માસ માટે પ્રતિકિલો ફેટ રૂા.700નો ભાવ ચુકવવાનો નિર્ણય કરી દૂધ ઉત્પાદકોની કપરી પરિસ્થિતીમાં સંઘ જ પડખે ઉભો રહે તેવા સાહસિક નિર્ણય લેવામાં ક્યારેય અમે પીછે હઠ કરી નથી તેમ ડેરીના અધ્યક્ષશ્રી જણાવ્યું હતું.

કપાસિયાના ખોળમાં થયેલા ભાવવધારામાં અમૂલ દાણમાં પ્રતિ બેગે રૂા.100ની સબસીડી આપી સહાય રૂપ થવાનો નિર્ણય કરતા સંઘે 9 માસમાં રૂા.5 કરોડની સહાય સબસીડી સ્વરૂપે દાણમાં ચુકવેલ છે.

આ ઉપરાંત સભાસદોના અકસ્માત વિમામાં રૂા.10 લાખના વિમાનું કવરેજ કરવાનો નિર્ણય કરીને તેનું 1.30 કરોડનું થતું પ્રિમીયમ સંઘે ભરેલ છે. જે પૈકી જીલ્લાના 11 દૂધ ઉત્પાદકોનો અકસ્માતથી મૃત્યુ થતા તેમના વરસદારને રૂા.10 લાખના વિમાની રકમ મૂજબ કુલ રૂા.1.10 કરોડની રકમ મંજૂર કરાવી ચુકવેલ છે. આ રીતે સંઘે સામાજીક જવાબદારી નિભાવી છે.

આવી વિકટ પરિસ્થિતીમાં પશુમાં દૂધનું ઉત્પાદન ઘટતા સ્વાભાવિક દૂધ સંપાદનમાં ઘટાડો થાય તેની સામે દૂધનું વેંચાણ વધતા અને આપણા વફાદાર ગ્રાહકોને અમૂલ દૂધ પૂરતા જથ્થામાં મળી રહે તે માટે 4-5 માસ દૂધ, દૂધનો પાઉડર, માખણ વગેરે અન્ય દૂધ સંઘમાંથી લાવતા અંદાજે રૂા.15 કરોડનો સંઘને આર્થિક વધારાનો બોજ પડેલ છે. તેવી વિકટ પરિસ્થિતીમાં અમૂક નિર્ણયો દૂધ ઉત્પાદકોની કઠિન પરિસ્થિતીમાં લેવાની ફરજ પડેલ છે.

ખાસ કરીને સંઘ દૂધ ઉત્પાદકોનું હિતો ઉપર ધ્યાન આપીને દૂધ ઉત્પાદકોને મહત્તમ ફાયદા કરાવેલ છે પરંતુ ગુણવત્તાની બાબતમાં કડક નિર્ણય લેવામાં કોઈની શેહ શરમ સંઘનું મેનેજમેન્ટ રાખતું નથી. સંઘે વર્ષ દરમિયાન 105 દૂધ મંડળી બંધ કરેલ છે. નબળી ગુણવત્તાવાળું 1,95,739 કિલો દૂધના જથ્થાનો નાશ કરેલ છે.

સંઘે કોરોનાની વિષમ પરિસ્થિતીમાં દૂધ ઉત્પાદકોને મદદરૂપ થવા એપ્રિલ માસમાં ઐતિહાસીક રૂા.680નો ભાવ ચુકવેલ છે. જ્યારે ખેડૂતોને દૂધની આવક સિવાય કોઈ અન્ય આવકનું સાધન નહોતું તે પરિસ્થિતીમાં દૂધની આવક વધવા છતાં એકપણ દિવસ ઓફ રાખ્યા વગર દૂધના પુરવઠાનું યોગ્ય વ્યવસ્થાપન અને નિકાલ કરી દૂધ ઉત્પાદકોની સેવા કરવામાં આવેલ છે.

ગત વર્ષમાં ખોળનો ભાવ રૂા.1800 હતા. ત્યારે આજે સમયસર વરસાદ, ખોળ/દાણનો ભાવ અનુક્રમે રૂા.1100 અને રૂા.850 છે. છતાં પણ અત્યારે દૂધનો ખરીદ ભાવ રૂા.660 હાલમાં ચુકવે છે. જે સૌરાષ્ટ્રના અન્ય દૂધ સંઘો કરતા વધુ ચુકવવામાં આવે છે.

આ માહિતી આપવાનો મુખ્ય હેતુ એ છે કે મારા અને નિયામક મંડળ ઉપર સૌએ 5 વર્ષની જવાબદારી સોંપેલ છે તેમાં અમે શક્ય તેટલા તમામ પ્રયત્નો કરેલ છે અને સૌનો અમને સહકાર મળેલ છે. અમે સૌનો વિશ્ર્વાસ જાળવવા પ્રયત્નશીલ છીએ ભવિષ્યમાં અમે વિશ્વાસ જાળવી રાખવા પ્રયત્નશીલ રહીશું તેની ખાતરી આપીએ છીએ તેમ દૂધ સંઘના અધ્યક્ષ શ્રીએ જણાવ્યું હતું.

ખેતી અને પશુપાલનની માહિતી મેળવવા માટે અમારા ફેસબુક પેજ Khedut Help ને લાઈક અને ફોલો કરો. આ ઉપરાંત અમારા વોટ્સએપના બ્રોડકાસ્ટ લિસ્ટમાં જોડાવવા માટે 7990263411 પર તમારું નામ અને જિલ્લાનું નામ લખીને વોટ્સએપ પર મેસેજ કરો.

અમારા ફેસબુક પેજની લિંક 👉🏻 Khedut Help

અમારા વોટ્સએપ બ્રોડકાસ્ટ લિસ્ટમાં જોડાવવાની લિંક 👉🏻 Khedut Help Whatsapp